Prof Jagan Nath Azad

Selected Poems

 

Selected from:
Bachchon Ki Nazmein | Bekran | Boo-e-Rameeda | Gehwara-e-Ilm-o-Hunar
Intikhab-e-Kalam-e-Jagan Nath Azad | Justaju | Kahkashan | Nawa-e-Pareeshan
Sitaron Se Zarron Tak | Watan Mein Ajanabi


 
Bekra.n
From Bekran


Ghazal

Mumkin nahi.n ki bazm-e-tarab phir sajaa sakoo.n

Ab yeh bhi hai bahut ki tumhei.n yaad aa sakoo.n

Yeh kyaa talism hai ki teri jalvaagaah se

Nazdeeq aa sakoo.n na kahi.n door jaa sakoo.n

Zauq-e-nigaah aur bahaaro.n ke darmiya.n

Parde girey hei.n voh ki naa jin ko uthaa sakoo.n

Taaro.n ki gardisho.n kaa uraa'oo.n mazaaq mai.n

Mai.n tum ko ek baar jo vaapas bulaa sakoo.n

Kis tarah kar sakogey bahaaron ko mutma'in

Ahl-e-chaman jo mai.n bhi chaman mei.n na aa sakoo.n

Us bazm mei.n jahaa.n naa Adam hai naa hai Qateel

Meraa qasoor kyaa jo taraaney na gaa sakoo.n

Teri hasee.n fizaa mei.n mere ai naye vatan

Aisaa bhi hai koi jise apnaa banaa sakoo.n


Azad! Saaz-e-dil pe hei.n raqsaa.n voh zamzamey

Khud sun sakoo.n magar naa kisi ko sunaa sakoo.n

Ghazal

Top


Sitaro.n Se Zarro.n Tak
From Sitaron Se Zarron Tak


Ruba'ai

Hairat hai gham-e-jahaan tujhe raas nahi.n

Shaa'ir hai par itnaa bhi tujhe paas nahi.n

Bulbul ki fughaa.n pey ro rahaa hai lekin

Aadam ki fughaa.n ka tujh ko ehsaas nahi.n

Rubai


Ek Sher

Zamee.n se door taaro.n par nigaahei.n daalney valey

Khabar bhi hai ki yeh khaaki qaraah bhi ik sitaaraa hai

Gorky

Ek Sher

Top


Intikhab-e-Kalam-e-
Jagan Nath Azad
Intikhab-e-Kalam-e-Jagan Nath Azad


Ahbab-e-Pakistan Ke Naam

Ik naya maahaul ik taaza samaa.n paida kare.n

Dosto! Aao muhabbat ki zubaa.n paida kare.n

Ho sake to ik bahaar-e-gulfishaa.n paida kare.n

Apne haatho.n se na ab daur-e-khizaa.n paida kare.n

Taabe ke begaanagi ehsaas par taari rahe

Ek maahaul-e-fiza-e-dostaa.n paida kare.n

Jang ke shole to thande ho chuke muddat hui

Aao ab un ki jagaah ik gulistaa.n paida kare.n

Dosto! Jis par hame.n bhi naaz thaa tum ko bhi fakhr

Phir wohi sarmaaya-e-dard-e-nihaa.n paida kare.n

Boo kabhi baarood ki jis ke qareeb aane na paaye

Ek aisaa aalam-e-aman-o-amaa.n paida kare.n

Kal likhi thi ham ne.n auro.n ke dilo.n ki daastaa.n

Apne khoon-e-dil se ab ik daastaa.n paida kare.n

Keh rahi hai ham se yeh taareekh ki aawaaz aaj

Hind-o-Pak ik etthaad-e-jism-o-jaa.n paida kare.n


Jazba-e-fitrat agar dil mei.n niha.n ho jayega

Ek din aayega donon.n ka zubaa.n ho jaayega

Kya kahoo.n mei.n ab jo haal-e-gulista.n ho jaayega

Shola-e-bebaak agar khus mei.n rava.n ho jaayega

Hu.ns rahi hai aaj ik duniya hamaare haal par

Dosto! Is tarah to dil khoo.nchaka ho jaayega

Hum agar ik doosare par mehrbaa.n ho jaaye.n aaj

Hum pe goya ik zamaana mehrbaa.n ho jaayega

Jadah-e-mehr-o-wafa par gar na hum mul kar chale

Jo hai zarra raah ka sang-e-gira.n ho jaayega

Ik hamaari aur tumhaari dosti ki deir hai

Jo mukhaalif aaj hai kal mehrbaa.n ho jaayega

Phir ghazal ko laut aayegi meri fikr-e-jameel

Aur hi mera kuchch andaaz-e-baya.n ho jaayega

Aur agar yaaro! zaraa bhi hum nei.n is mei.n deir ki

Hur gul-e-tar ek chashm-e-khoo.n-fisha.n ho jaayega

Ahbab-e-Pakistan ...

Top




Watan Mei.n Ajanabi
From Watan Mei.n Ajanabi


Asha'ar

Written in Lahore



Teri bazm-e-tarab mei.n soz-e-pinha.n le ke aaya hoo.n

Chaman mei.n yaad-e-ayyaam-e-bahara.n le ke aaya hoo.n

Teri mehfil se jo armaan-o-hasrat le ke nikla tha

Woh hasrat le ke aaya hoo.n woh armaa.n le ke aaya hoo.n

Tumhaare waaste ai dosto mai.n aur kya laata

Watan ki subah tak shaam-e-ghareeba.n le ke aaya hoo.n

Mai.n apne ghar mei.n aaya hoo.n magar andaaz to dekho

Ki apne aap ko maanind-e-mehmaa.n le ke aaya hoo.n

Nigaaho.n mei.n andhere ke siva kuchch bhi nahi.n lekin

taffakur mei.n jamaal-e-subah-e-tabaa.n le ke aaya hoo.n

Siva is ke ab ai Azad! Mera bas kaha.n tak hai

Andheri raat mei.n zikr-e-chiraghaa.n le ke aaya hoo.n

Asha'ar

Top
Back to Azad's Biography


Kahkshaa.n

From Kahkashan

15 August 1947



Na poochcho jab bahaar aayi to deevano.n pe kya guzari

Zaraa dekho ki is mausam mei.n farzaano.n pe kya guzari

Bahaar aate hi takraane lage kyu.n saaghir-o-meena

Bataa ai peer-e-maikhaanaa! Yeh maikhaano.n pe kya guzari

Fiza mei.n har tarf kyu.n dhjjiaa.n awaara hai.n un ki

Janoon-e-sar faroshi! Tere afsaano.n pe kya
guzari

Vissal-e-shama'a ki hasrat mei.n sab betaab phirte the

Mai.n kya janoo.n huzoor-e-shama'a parvaano.n pe kya guzari

Kaho dair-o-haram waalo! Yeh tum nei.n kya fasoo.n phoonka

Khuda ke ghar pe kya beeti sanam-khaano.n pe kya guzari

Nishaan-e-berg gul tak bhi nazar aata nahi.n hum ko

Samajh mei.n kuchch nani.n aata gulistaano.n pe kya guzari

Jahaan-e-nau sahar ke bhi qadam jamane na paaye the

Bataaye kaun aakhir in shabistaano.n pe kya
guzari

Woh rang-o-noor se bharpoor bustaano.n pe kya beeti

Shabaab-o-sher se makhmoor Kaashaano.n pe kya guzari

Abhi to chashm-e-ibrat waqt ki raftaar dekhegi

Abhi yeh kis tarah keh dei.n sitamraano.n pe kya
guzari

Na poochch Azad! Apno.n aur begaano.n ka afsaana

Hua thaa kya yeh apno.n ko yeh begaano.n pe kya guzari

August 1947

Top


Nawa-e-Pareesha.n

From Nawa-e-Pareeshan

Azad Aur Iqbal



Azad

Tamaam shauq se maine suna payaam tera

Magar samajh na sakaa mai.n khudi ka raaz ab tak

Jahaan-e-zeest mei.n kya hai khudi ki marg-o-hayaat

Fughaa.n ke tishna-e-mizraab hai yeh saaz ab tak



Iqbal

Khudi ho zinda.h tau hai fiqr bhi shahanshaahi

Nahi.n hai Tughral-o-Sanjar se kam shikoh-e-faqeer

Khudi ho zinda.h tau daryaa-e-bekra.n paayab

Khudi ho zinda.h tau kohsaar purnihaan-o-hareer

Khudi ki maut se maghrib ka androo.n benoor

Khudi ki maut se mashriq hai mubtila-e-jazaam

Khudi ki maut se rooh-e-Arab hai be-tab-o-taab

Badan Iraq-o-Arab ka hai be arooq-o-azaam

Azad Aur Iqbal

Top


Bachcho.n Ki Nazmei.n

From Bachchon Ki Nazmei.n

Kisaano.n Ka Geet



Qadam apnaa aage barhaate chaleinge

Zamaane ki big.di banaate chaleinge

Zameeno.n pe jab hal chalaate chaleinge

To mitti se sona ugaate chaleinge


Nishaa.n bhook ka hum mitaate chaleinge

Zamaane ki big.di banaate chaleinge


Kahi.n chaavalo.n se sajaayenge duniya

Kahi.n baajre se basaayenge duniya

Chane ki kahi.n hum banaayenge duniya

Jo hai kaal us ki mitaayenge duniya


Nishaa.n bhook ka hum mitaate chaleinge

Zamaane ki big.di banaate chaleinge


Nahi.n kaam karane se hum thakane waale

Jahaa.n jaanata hai ki hum hei.n jaial.e

Andhere ki duniya mei.n hum hai.n ujaale

Ki hai.n hum ba.di sakht mehnat ke paale


Nishaa.n bhook ka hum mitaate chaleinge

Zamaane ki big.di banaate chaleinge

Azad Aur Iqbal

Top


Boo-e-Rameeda

From Boo-e-Rameeda

Gulmarg

Tha shauq mira jis ke tajussus mei.n azal se

Pa hi liya nazro.n nei.n woh nayaab khazeena


Har zarra hai seene mei.n liye noor ka aalam

Yeh wadi-e-Gulmarg hai ya wadi-e-seena


Ik safha-e-khaaki pe nikharte hu.e sau rang

Yeh husn yeh khoobi yeh nafaasat yeh qareena


Ya fiqr ki pakeezgi saanche mei.n dhali hai

Gardoo.n se utar aayee hai ya koi haseena


Allah re Gulmarg ter.e husn ki maujei.n

Maujo.n mei.n teri gum hai mere dil ka safeena


Ai manzar-e-firdaus mere dil mei.n utar aa

Hazir meri aankhe.n hai.n banaa le unhei.n zeena


Kashmir hai ik khhaatam-e-nayyab zamaana

Tu khhaatam-e-nayyab zamaana ka nageena

Gulmarg

Top


Gehwara-e-Ilm-o-Hunar

From Gehwara-e-Ilm-o-Hunar

Dushambe Mei.n Pehli Shaam

Ai mere zauq-e-talab yeh kis chaman ki shaam

Tajikistan ki hai ya mere watan ki shaam

Mujh ko tau is shehr par hota hai Dehli ka gumaa.n

Yeh tau hai.n ai jazb-e-dil! apne zamee.n-o-aasmaa.n

Is zamee.n ki khhaak hai Kashmir ki khhushbu liye

Pei.d patt.e hai.n dayaar-e-Hind ka jaadaa.h liye

Raat ko dekha to jais.e Bumbaee ka shehr hai

Zindagi ka, sarkhhushi ka, raushani ka shehr hai

Saahil-e-dariya yaha.n ka saahil-e-Jamuna ka aks

Ye tajalli hai yaha.n ki ya meri duniya ka aks

Ek mehmaa.n ke liye kaise bichche jaate hai.n log

Sadq ka, ikhhlaas ka paikar bane jaate hai.n log

Kaun sa rishta hai woh jo is qadar paainda hai

Aaj duniya ki andheri raat mei.n rakhhshinda hai

Ek rishta hai zaba.n ka who bhi kuchch kamzor sa

Sher ke husn-e-baya.n ka woh bhi kuchch kamzor sa

Kya khhabar is des ki kis baat ki mashoor hoo.n

Yeh khhayaal aata nahi.n hai mai.n watan se doo.r hoo.n

Jaag ai Azad! Ab is khwaab ke aalam se jaag

Kis liey chchera hai toone be-yaqeeniyat ka raag

Rishta-e-sher-o-zuba.n kamzor ho sakta nahi.n

Sishta-e-husn-e-baya.n kamzor ho sakta nahi.n

Bazm-e-Bedil ka yeh ghar hai, bazm-e-Ghalib ka watan log

Naghma-e-Iqbal se ma'amoor hai yeh anjuman

Ek jaanib hai nishaat-e-rooh Aiyni ka kalaam

Doosari mehfil mei.n sher-e-khhird-e-aali maqaam

Saath hi apne takallum ki pazeeraee bhi dekh

Dil ki aankho.n se yeh andaaz-e-dilaaraani bhi dekh

Aur us ki teh mei.n ik pehlu bara gambheer hai

Jo dio.n ki wadio.n mei.n masl-e-ju-e-shamsheer hai

Yeh ta'aluq dard-e-insaa.n ka, gham-e-daura.n ka hai

Yeh ta'aluq ik rajayat bhar.e arma.n ka hai

Jis ki zu se aaj yeh shehr-r-hasi.n taabinda.h hai

Jis ki zu se Tajikista.n ki janbi.n taabinda.h hai

Eminent poet, the late Sadr-ul-din Aiyni

Dushambe Mei.n Pehli Shaam
Note

Top


Justaju
From Justaju


Lahore

Rubaiyaat




Ai meri muraado.n ke chaman tujh ko salaam

Ai mere ladakpan ke watan tujh ko salaam

Pehle mai.n tujh mei.n tha hai tu ab mujh mei.n

Ai dil ke jaha.n ki anjuman tujh ko salaam

----------------


Naghmo.n se teri fazaaei.n ma'amoor rahei.n

Masti se teri hawaaei.n bharpoor rahei.n

Woh lamhe ke shehro.n pe gira.n hote hai.n

Woh tujh se bahut doo.r bahut doo.r rahei.n

----------------


Gehwaara-e-aafiyat mei.n aabaad rahei.n

har ranj-o-gham-o-muhan s azad rahei.n

Woh log jo bast.e hai.n teri duniya mei.n

Meri hai yehi dua ki dilshaad rahei.n

----------------


Rishta yeh wafa ka tha na toda main.e

Munh teri muhabbat se na moda main.e

Tun.e to mujhe par.e bhej diya

Lekin daaman tera na chhoda main.e

----------------


Kya tujh se kahoo.n kitna bura ho jaata

Ikhhlaas mera mujh se khhafa ho jaata

Teri bhi to duniya mei.n kami aa jati

Mai.n tujh se jo such-much hi juda ho jaata

?
 

Top
Back to Azad's Biography


Updated on 26 April 2007
Layout, design & revision © 2006 Pammi Taylor